عن العبد لله -5-

الأجزاء اللى فاتت

1- http://welshzone.blogspot.ae/2013/12/1_26.html
2- http://welshzone.blogspot.ae/2013/12/2_26.html
3- http://welshzone.blogspot.ae/2013/12/1-2.html
4- http://welshzone.blogspot.ae/2013/12/4_26.html

فيه مواقف تاني عن موضوع إن فيه ناس مهمتهم إنهم يشككوا فيك ويحبطوك ما يعرفوش يعملوا أى حاجة تاني ، حتي لما روحت الجيش كانت كل التوقعات أسبوع ( وأكُت ) الحمد لله خلصت والدنيا فُل وكنت صاعقة كمان ( أيام زي الفل ) :) أه والله .. أه والله .. أه والله :) ، يعنى تقدر تقول كده على طول فيه شكوك فى إنى أقدر أعمل أو أخلص حاجة والحمد لله بتخلص :) مش عارف ده لإن طريقة حياتي كانت بتدي الناس إنطباع إن دماغي فاضية ولا شكلي مش عاجبهم !! :)

( أنا برغي ولا حاجة ؟ ) وحتي لو برغي يعنى إنت وراك إيه ؟ أكيد هتفهم القصد من الحكايات دي .

ولا أقولك .. بلاش .. مش هطول عليك .. اللى عايز أوصلهولك إن تقريبا كل حاجة أعرفها وبعملها دلوقتى أنا اللى علمتها لنفسي لإني قابلت ناس ممكن يموتوا وما ينفعوكش ، تقول للواحد من دول ( هى دي بتتعمل إزاي؟ ) تحس إنك بتسأل ( كونفيشيوس ) وفى الآخر ياريت بيرد عليك أويفيدك لا ده ما بيحصلش ، فقررت ما اسألش حد وإنى أعمل كل حاجة بنفسي ، مش معنى كده إنى كنت جهبز يعنى ، طبقا لملفات المدرسة أنا الطالب الوحيد فى تاريخ المدرسة اللى جاب ملحق ( دين - رسم - تربية وطنية ) ( إضحكوا .. إضحكوا :) ) محضرتش الدين ولا التربية والوطنية  وإمتحان الرسم كان ليه ظروف منيلة بنيلة عشان الأبلة كانت بتستهبل ( ………) .

المهم إنى قررت لما  أعرف وأتعلم مش هستخسر فى حد ومش هعامل الناس بالمثل ، واللى أقدر أعلمه حاجة هعلمهاله .

لما جاللى الـ Offer فى مصر كان مكتوب فيه Security :) دي كانت تقريبا الشغلانة الوحيدة اللى ما إشتغلتهاش فى مصر ، أنا ماقولتش صحيح ، فيه أوقات كنت بسيب شغل وبنقل على شغل فطبعا بينهم مدة المفروض إني أبقي قاعد فى البيت بس ما كنتش بعمل كده ، كنت بشتغل في أى حاجة أى كانت بجد أى حاجة بالذات بعد الثانوية على سبيل المثال ( سباك ، نجار ، بركب ألوميتال ، Graphic Designer ، Data Entry ، وحاجات تانية كتير ساعات كنت بطلع من حاجة أروح مكان تاني فى نفس اليوم حتي إشتغلت ويتر فى ( مرقص ) :) كباريه يعني :) بس الراجل مشاني عشان الرقاصة :D محدش يفهم غلط .. بس ده اللى حصل جه قاللى ( ياعم وليد يا خاربها ... أنا حاسس إنك زي الزباين دول بس إنت بتاخد مني فلوس .. أقولك ما تجيش بكرة ) وسيبته وإشتغلت فى قهوة أيام المعهد فى وسط البلد كنت أخلص وأروح على هناك قعدت فيها 6 شهور كل يوم بسمع كلام من عينة ( طيب يابني ما تشوف حاجة أحسن - الواد إبن الكلب إبني ياريته بيشاغل زيك كنت مسكته المحل - ياعم إنت أبوك راجل محترم بلاش تشتغل الحاجات دي ) مش عارف أنا إيه اللى دخل الإحترام فى الموضوع ، أه أبويا كان معارض اللى المرمطة دي بس أنا متأكد إنه كان متكيف ع الأقل مش قاعدله ع الكنبة ليل نهار وهو فى الوقت ده كان مدير إدارة في شركة كبيرة .. وماسك حسابات أكبر 4 عائلات فى وسط البلد وكل شغلهم فى مصر كلها. المهم إنى ما بقفش وما بفصلش وكنت حاطط اللى عملته فى مصر قدامي وأنا مسافر وإنى رايح أبدأها من تحت تاني والمرة دي فى بلد غريبة معرفش فيها إلا كام واحدة على فيسبوك وأربعة مسافرين معايا أول مرة أقابلهم ، وواحد إسمه باسم هيبقي مديرى ومعرفش هوإيه !!

وجه يوم السفر ..